Оқу жылы Академиялық және Зерттеу Кеңесінің (Ғылыми кеңестің) шешімімен бекітілген, академиялық күнтізбеге сәйкес басталады және аяқталады.

Оқу жылы академиялық кезеңдерден (семестр – 15 апта, триместр – 10 апта, тоқсан – 7-8 апта, қосымша кезеңдер: жазғы және қысқы мектептер), практикадан, каникулдан, қорытынды аттестаттау кезеңдерінен (бітіруші курста) тұрады. Оқу жылы бойына демалыс күндері (каникул және мереке) ескерілген оқу және бақылау шаралары, кәсіптік практиканы өткізудің негізгі күндері академиялық күнтізбеде көрсетілген.
Жазғы және қысқы мектептер қосымша оқудағы қажеттілікті қанағаттандыру, академиялық берешекті немесе оқу жоспарындағы айырмашылықты жою, оқу пәндерін меңгеру және өз оқу орнында оларды міндетті түрде қайта санап білім алушылардың басқа жоғары оқу орындарында кредиттерді игеруі, үлгерімнің орташа баллын (GPA) арттыру үшін ұйымдастырылады.

Әрбір академиялық кезең білім алушылардың емтихан сессиясымен аяқталады, оның ұзақтығы 1 аптадан кем болмауы тиіс. Каникулдар білім алушыларға оқу жылы бойы кемінде 2 рет беріледі, олардың жалпы ұзақтығы, бітіруші курсты қоспағанда, 7 аптадан кем болмауы тиіс.

Бакалавриатта оқудың нормативтік мерзімі 4 жылды немесе техникалық және кәсіптік білім негізінде 3 жылды құрайды.

Ақылы негізде оқитын студенттің оқу мерзімі таңдалған оқу траекториясы негізінде дербес айқындалады, бірақ академиялық демалыстағы үзілісті ескермегенде 10 жылдан аспауы тиіс.

Магистратурада оқудың нормативтік мерзімі:

– бейінді бағыт – 1 жыл;
– бейінді бағыт – 1,5 жыл;
– ғылыми-педагогикалық бағыт – 2 жыл

Ақылы негізде білім алатын магистранттың оқу мерзімі таңдалған оқу траекториясы негізінде дербес айқындалады, бірақ академиялық демалысқа үзілісті ескермегенде 3 жылдан аспауы тиіс.
Докторантурада оқудың нормативтік мерзімі 3 жылды құрайды

M.S.Narıkbaev atyndaġy KAZGUU Unıversıteti-нде білім алушылар мен тыңдаушылардың мынадай жіктелуі бар:

1) білім алушы – оқудың білім беру бағдарламаларын аяқтауға және академиялық дәрежені алуға ниетті кез келген білім алушы. Білім алушыларға студенттер, магистранттар және докторанттар жатады.
2) алмасу бойынша білім алушы – академиялық ұтқырлық бағдарламасы бойынша M.S.Narıkbaev atyndaġy KAZGUU Unıversıteti-нде оқып жатқан, басқа университеттен келген кез келген білім алушы;
3) тыңдаушы (audit) – академиялық дәреже берілмей білім беру бағдарламасының бір бөлігін игеруге жіберілген кез келген тұлға;
4) тыңдаушы (non-degree) – білім беру бағдарламасына қабылдану үшін Жоғары мектептің талаптарын орындаған, білім беру бағдарламасының бір бөлігін игеруге жіберілген кез келген тұлға.
Тыңдаушы (non degree) ретінде пәндерді оқуға жіберілген тұлғаның жалпы орта білімді аяқтау туралы құжаты, техникалық және кәсіптік немесе жоғары білім туралы дипломы немесе түлектердің ұлттық бірыңғай тестілеу (бұдан әрі – ҰБТ) немесе кешенді тестілеу (бұдан әрі – КТ) тапсыруы туралы жарамды сертификаты болуы тиіс.
5) «Жоғары сынып (10-11-сынып) оқушыларына арналған бакалавриат» бағдарламасының тыңдаушысы (Provisional Program).

Бір қазақстандық академиялық кредиттің еңбек сыйымдылығы (30 академиялық сағат) ECTS-тің 1 кредитіне сәйкес келеді.
Оқу жылы бойы күндізгі оқу нысаны бойынша білім алушының қалыпты оқу жүктемесі 60 ECTS-ті құрайды, бұл, орташа есеппен алғанда, жылына 1800 сағатқа сәйкес келеді (бір ECTS-ке 30 сағат тиесілі), жекелеген білім алушылар/жұмыс түрлері үшін оқу нәтижелеріне қол жеткізудің нақты уақыты әртүрлі болуы мүмкін.
Бакалавриат студенттері үшін академиялық кезеңде ұсынылатын оқу жүктемесі Жоғары мектептің академиялық каталогында анықталған.
Білім алушы өз бетінше тіркеле алатын семестрдегі академиялық кредиттердің/ECTS ең көп саны – 30 академиялық кредит/ECTS, семестрдегі кредиттердің ең аз саны – 20 академиялық кредит/ECTS .
Студент эдвайзердің рұқсатымен Аcademic Probation мәртебесіне ие болмаған жағдайда 31-35 академиялық кредитке/ECTS тіркеле алады.

Ерекше жағдайларда студенттерге Мектептің Академиялық сапа комитетінің шешімімен көбірек (36-дан 40 академиялық кредитке дейін) немесе азырақ (20 академиялық кредиттен кем) кредит оқуға рұқсат берілуі мүмкін.
Жазғы мектеп кезеңінде білім алушы 20-дан артық емес ECTS, қысқы мектеп кезеңінде 10-нан артық емес ECTS оқи алады.
Оқу жылының қорытындысы бойынша GPA деңгейі 2,0-ден төмен студентке Academic Probation мәртебесі беріледі, студент курстан курсқа ауыспайды және академиялық сынақ мерзімінде болады.

Академиялық сынақ мерзіміндегі (Academic Probation) студент:

– егер бүкіл оқу кезеңінде GPA 1,67-ден 2,0-ге дейін болса, семестрде 20 академиялық кредиттен/ECTS артық емес;
– егер бүкіл оқу кезеңінде GPA 0-ден 1,66-ға дейін болса, семестрде 15 академиялық кредиттен/ECTS артық емес кредиттерге тіркеле алады.
Академиялық сынақ мерзіміндегі магистранттар кемінде 20 академиялық кредитке/ECTS тіркеле алады.
Білім алушы жоспарланған оқу нәтижелерін меңгерген жағдайда ғана, оған кредиттер тағайындалады.
Негізгі білім беру бағдарламасы аясында білім алушы оқу үшін бір не бірнеше қосымша білім беру бағдарламаларын (minor) таңдай алады.
Қосымша білім беру бағдарламасы (minor):
– түсу талаптары болуы мүмкін: GPA, алдында оқыған пән-пререквизит болуы және т.б.;
– бір немесе бірнеше академиялық кезең ішінде оқытылатын бірнеше пәндерден тұрады;
– жекелеген сертификатталған бағдарлама ретінде ұсынылуы мүмкін (тыңдаушылардың әртүрлі санаттары үшін);
– пәндер әртүрлі академиялық кезеңдерде бірте-бірте оқылуы мүмкін («жинақтау жүйесі»), бірақ сертификат алу үшін біртіндеп меңгерілуі керек;
– студент Жоғары мектептің академиялық каталогынан өз бетімен таңдайды;
– білім беру бағдарламасы аясында (майнордың пәндері үшін кредиттер негізгі бағдарламаның 240 ECTS-ке кіреді) және /немесе негізгі білім беру бағдарламасына қосымша оқуға болады.

Негізгі білім беру бағдарламасы аясында екіден артық майнордың пәндерін оқуға рұқсат берілмейді. Егер білім алушы екіден артық майнорды меңгергісі келсе, онда ол Академиялық сапа комитетіне жүгінуі керек.
Майнор бағдарламасының талаптары Жоғары мектептің академиялық каталогында жазылған

Білім алушы оқу сабақтарының барлық түрлеріне қатысуға міндетті. Оқытушылар пән бойынша силлабуста оқу сабақтарына қатысуға қойылатын талаптарды көрсетеді.

Оқытушылар Attendance Canvas LMS модулінде білім алушылардың оқу сабақтарына қатысуын есепке алуды жүргізеді.

Академиялық кезеңдегі оқу сабақтарының жалпы санынан 20%-дан астам сабақ қалдырылған жағдайда пән игерілмеген болып саналады. Бұл ретте, теориялық оқу аяқталған соң пән бойынша ағымдағы бағаларының күші жойылады және «F» қорытынды бағасы қойылады. Егер силлабуста қорытынды емтихан көзделген болса, білім алушы қорытынды емтиханға жіберілмейді.

Ерекше жағдайларда (білім алушы немесе кәмелетке толмаған бала науқастанғанда, жақын туысқандары қайтыс болған жағдайда (әкесі, анасы, әжесі, атасы, туған ағасы-інісі және апасы-сіңлісі (қарындасы), баласы, зайыбы, Университет білім алушыны білім беру не ғылыми шараға жібергенде) білім алушы бақылау шараларының орнын толтыруға рұқсат алу үшін Академиялық сапа комитетіне жолыға алады.

Қашықтан оқыту түріндегі онлайн-сессиясын өткізу кезінде оқытушы әр білім алушының кірген өз аккаунтынан, әрі қатысушының онлайн-сессия кезіндегі іс-әрекеті туралы ақпараттардан қай платформа не қызмет түрін пайдаланса да (LMS Canvas, ZOOM etc) бейне ағынының трансляциясы негізінде сабаққа қатысуын ескереді. Қолданылып отырған платформа не қызмет түрінде білім алушымен үнемі визуалды байланыс болмаған жағдайда оқытушы білім алушыға сабаққа себепсіз қатыспағанын белгілейді. Видео түсірілімді көрсетуде техникалық қиындықтар туындаған жағдайда білім алушының тікелей қатысып отырғанын дәлелдеу оқытушыға жүктеледі (ара-тұра дауыспен бар-жоғын тексеру, қызықтырып, тартуға арналған тақырыптық сұрақ қою т.б.).

Оқу сабақтарына қатыспағаны үшін «F» қорытынды бағасын алған білім алушы келесі академиялық және қосымша кезеңдерде ақылы негізде аталған пәнді қайта оқуға құқылы. Ол үшін білім алушы оқу пәніне тіркелу рәсімінен қайтадан өтуі тиіс.

Академиялық күнтізбеде пәндерге қайта тіркелу үшін белгіленген кезеңде оқу сабақтарынан қалу Canvas LMS-те ескерілмейді.

Білім алушылардың оқу жетістіктері (білімдері, дағдылары, машықтары және құзыреттіліктері) халықаралық тәжірибеде қабылданған сандық баламасымен әріптік жүйеге (жақсы бағалар, кемуі бойынша, «А»-дан бастап «D»-ға дейін, әрі «қанағаттанарлықсыз» – «FХ», «F») және дәстүрлі жүйе бойынша бағаларға сай келетін, 100 баллдық шкала бойынша баллмен бағаланады.
Оқу тапсырмаларының барлық түрлері бойынша білім алушылардың оқу жетістіктері білімді бағалаудың баллдық-рейтингтік әріптік жүйесі бойынша бағаланады, дәстүрлі бағалар шкаласына аудару 2-кестеге сәйкес жүргізіледі.
2-кесте. Дәстүрлі бағалар шкаласына аударумен білім алушылардың оқу жетістіктерін бағалаудың баллдық-рейтингтік әріптік жүйесі

«F» белгісіне сәйкес келетін «қанағаттанарлықсыз» қорытынды баға алған жағдайда, білім алушы аталған пәнге/модулге қайта жазылуы, оның бүкіл бағдарламаласынан өтуі, барлық тапсырмаларды орындауы, белгіленген тәртіппен қорытынды бақылауға рұқсат алуға, қорытынды бақылауды (емтиханды) тапсыруы тиіс. Оқу пәніне/модулге тек ақылы негізде ғана қайта жазылуға болады
«Дене шынықтыру» пәні бойынша кредиттер беріліп «есепке алынған» немесе «есепке алынбаған» бағаларын қойып сынақ тапсырылады. GPA есептеу кезінде бағалары ескерілмейді.

1 және 2-курс студенттері міндетті түрде «Дене шынықтыру» пәнін өтуі тиіс.
Кәсіптік практиканың барлық түрлері бойынша баға қойылады, академиялық кредиттер беріледі. Практиканың барлық түрлері бойынша бағалар GPA есептеу кезінде ескеріледі.

M.S.Narıkbaev atyndaġy KAZGUU Unıversıteti-нде қаржылық қарызы бар білім беру қызметтерін алуға қолжетімділік қалпына келтіру құқығынсыз тоқтатылады, берешек қорытынды аттестаттау басталғанға дейін не келесі академиялық кезеңдегі пәндерге тіркелгенге дейін өтелуі тиіс кәсіптік практикадан өту жағдайларынан басқа білім алушының деректері Canvas LMS электрондық журналында автоматты түрде бұғатталады.

Емтихан нәтижелері емтихан аяқталғаннан кейін 5 (бес) жұмыс күні ішінде Canvas LMS-те жариялануы тиіс. Баға қою кезеңі білім алушыларың 50 және одан да көп емтихан жұмыстарын тексеретін емтихан алушылар үшін ұзартылуы мүмкін, бірақ бұл кезең 10 жұмыс күнінен аспауы тиіс.

Білім алушы емтихан нәтижелерімен келіспеген жағдайда ол апелляцияға өтініш бере алады. Аралық бағалау болған жағдайда, сол ереже қолданылады.

Білім алушы емтихан нәтижелері жарияланғаннан (Canvas LMS-ке қойылғаннан) кейінгі келесі жұмыс күнінен кешіктірмей Жоғары мектеп Деканының (директорының) атына апелляцияға өтініш береді.

Апелляциялық өтініш дәлелді болуы тиіс. Білім алушы өз бағалауымен келіспейтіндігіне қажетті дәлелді көрсетпеген жағдайда, өтініш берушіге апелляциялық өтініші қараусыз қайтарылады.

Комиссия берілген апелляциялық өтінішті сәйкесінше бес жұмыс күн ішінде қарайды.

Апелляциялық өтінішті бір емтихан алушы қарай алмайды және оны кемінде екі тәуелсіз сарапшы қарауы керек.

Егер оқытушы курс аяқталғаннан кейін білім алушының бағасын өзгерткісі келсе, ол Академиялық сапа комитетінің төрағасы немесе Жоғары мектептің деканы (директоры) атына өтініш жазады. Комитет немесе Жоғары мектептің деканы (директоры) мақұлдағаннан кейін Canvas LMS әкімшісі бағаны қою үшін рұқсат береді.

Бағаларды бөлу қисығы (Bell Curve) білім алушылардың нақты бағалаудағы нәтижелерінің деңгейіне, нақтылағанда студенттің пән аясында басқа білім алушыларға қарағанда жұмысты қалай орындағанына байланысты негізделген. Оқыту сапасын талдау және баға қою үшін қалыпты үлестіру диаграммасы құрылады (1-кестені қараңыз).

1-кесте. Бағаларды қалыпты бағалау (Bell Curve) диаграммасын құру үшін бағалардың үлестірімі

M.S.Narıkbaev atyndaġy KAZGUU Unıversıteti-нде оқытушылары ағымдағы барлық студенттердің құзыреттеріне сараланған бағалауды жүргізуге мүмкіндік беретін бақылау жұмыстарының әдістемелік әртүрлілігін қамтамасыз етуі керек.
Барлық бақылау іс-шараларын бағалау кезінде оқытушылар саны аз топтарды (30 адамнан кем) және сертификаттау бағдарламаларына кіретін пәндерді (ACCA, CFA, FRM, CIMA, HRCI және т.б.) қоспағанда, жоғарыда көрсетілген арақатынастарды ұстанады.
«Өте жақсы» (А, А-) (10%) қоюға жол берілетін бағалардың пайызын сақтау міндетті болып табылады, қалған бағалаулар бойынша нормадан жол берілетін ауытқу – 5%-дан аспайды.
Берілген қалыптан 5% және одан да көп ауытқу болған жағдайда Академиялық сапа комитетінде оқытушыны әрі қарай M.S.Narıkbaev atyndaġy KAZGUU Unıversıteti-нде оқытуға рұқсат ету туралы шешім қабылдай отырып, нақты оқытушылар бойынша оқыту сапасын жеке талқылауға және талдауға бастамашылық жасау.
Бағалардың рұқсат етілген саны «өте жақсы» (А, А -) асып кеткен жағдайда (10%) Академиялық сапа комитеті бақылау іс-шарасының немесе емтиханның нәтижелерін жою туралы шешім қабылдай алады.

Шағын топтардағы (30 адамнан кем) бағаларды үлестіру де оқыту нәтижелерін немқұрайлы, біржақты немесе біліксіз бағалау туралы куәландыратын қалыпсыз ауытқуларға жол берілмейтіндігіне талдау жасалады.
Оқу нәтижелерін немқұрайлы, біржақты немесе біліксіз бағалаудың белгілері келесідей:
• топтағы көптеген студенттерге қатысты бір типті (деңгейлі) бағалаудың басым болуы;
• күрделілік деңгейлері бойынша бақылау-өлшемдік іс-шараларының әдістемелік саралауының болмауы;
• ақпаратты қолданудың орнына оны есте сақтауды тексеруге бақылау-өлшеу іс-шараларын бағдарлау;
• мазмұн мен тапсырмаларды қарапайымдату, яғни білім беру бағдарламасына байланысты күрделіліктің әдістемелік деңгейін әдейі төмендету;
• білім алушылардың құзыреттерін бағалаудың айқындығы, объективтілігі және әділдігі талаптарына қайшы келетін кез келген өзге де іс-әрекеттер.

Үлгерімнің орташа баллы (Grade Point Average – GPA) – таңдап алған бағдарлама бойынша белгілі бір оқу кезеңі ішінде білім алушының қол жеткізген білім деңгейінің орташа өлшемді бағасы (осы оқу кезеңі ішіндегі кредиттердің жалпы санына пәндер бойынша аралық аттестаттау бағалары баллдарының сандық баламасындағы кредиттердің жалпы сомасының қатынасы).

GPA есептеу кезінде бағаның сандық белгіленуі пәнге бекітілген кредиттердің санына көбейтіледі. Барлық пәндердің нәтижелері қосылады. Үлгерімнің орташа жиынтық баллын анықтау үшін кредит сағатының мөлшері білім алушы алған кредиттердің жалпы санына бөлінеді.

Белгілі бір оқу кезеңі үшін білім алушының GPA мына формула бойынша анықталады: GPA = Иц1 х К1 + Иц2 х К2 + ../(К1 +К2 + …) =Кп,
мұнда:
Иц1, Иц2 – сандық баламада пәндер бойынша қорытынды бағалар;
Kl, К2 – оқыған пәндердің көлемдері кредитте;
Кп – бүкіл оқу кезеңінде оқыған пәндердің жалпы көлемі кредитте.
Үлгерімнің орташа баллын есептеу кезінде оқу пәні бойынша соңғы бағалар ескеріледі.
Білім алушының транскриптінде GPA көрсетіледі: академиялық кезең, оқу жылы және бүкіл оқу кезеңі үшін.
Кейбір пәндер академиялық пәндердің құрамына кірмейді және олар бойынша алынған кредиттердің саны білім алушы курстан курсқа өткен кезде ескерілмейді, оларды оқу міндетті болып табылады. Қосымша пәндердің тізімі оқу жоспарында бекітіледі.

Кредиттерді аудару – бір мәнмәнтінде (бағдарламада, оқу мекемесінде) алған кредиттерді біліктілікті алу мақсатымен басқа ресми мәнмәтінде тану процесі. Білім алушыларға бір бағдарлама бойынша тағайындалатын ECTS кредиттері дәл сол немесе басқа оқу орны іске асыратын басқа бағдарламаға аударылуы мүмкін.

Кредиттердің танылуы оқу нәтижелеріне, яғни біліктіліктің немесе оның компоненттерінің аяқталуына әкелген ресми рәсімдерге емес, білім алушының нақты білімі мен дағдыларына негізделеді.

Кредиттерді тану тиісті деңгейдегі қол жеткізілген оқу нәтижелері үшін алынған сынақ бірліктерінің саны басқа мәнмәтінде сынақ бірліктерін тағайындайтын оқу орнында оқытудың осы нәтижелері үшін айқындалған сынақ бірліктерінің санын алмастыратынын білдіреді. Мысалы, егер оқу нәтижелері баламалы болса, тәжірибеде тұлға академиялық ұтқырлық бағдарламасы бойынша оқитын оқу орнындағы бір элемент үшін 4 академиялық кредит/ECTS M.S.Narıkbaev atyndaġy KAZGUU Unıversıteti-ндегі бір элемент үшін академиялық кредитті/ 5 ECTS-ті ауыстыра алады.

Оқу пәндері бойынша игерілген кредиттерді қайта санау кезінде қорытынды бақылау нысандарындағы айырмашылық назарға алынбайды. Сынақ ең төмен D-дан бастап (1,0; 50-54 %) ең жоғары А-ға дейінгі (4,0; 95-100 %) көлемде білім алушылардың оқудағы жетістіктерін төрт баллдық жүйе бойынша сандық баламасына сәйкес бағалаудың әріптік жүйесіне теңестіріледі.

Академиялық сапа комитеті пәндер бойынша ECTS кредиттерін тану және қайта санау туралы шешімді білім беру бағдарламаларын, игерілген пәндер тізімінің мазмұнын, олардың көлемін, алған білімін, дағдыларын, машықтары мен құзыреттіліктерін, қол жеткізілген оқу нәтижелерін және бағалау нәтижелерін салыстыру негізінде қабылдайды.

Академиялық сапа комитетінің шешімі хаттамамен рәсімделеді. Кейбір жағдайларда Комитет пәнді қайта оқу, басқа элективті пәнді оқу, контенттегі айырмашылық анықталған жағдайда пән бойынша емтиханды тапсыру туралы шешім қабылдауы мүмкін. Эдвайзер Академиялық сапа комитетінің шешімі негізінде оқу жоспарлары бойынша пәндердегі айырмашылықты түзетеді.

Академиялық сапа комитетінің шешімі бойынша кредиттер қайта саналуы мүмкін:

– халықаралық бакалавриат бағдарламаларының және Назарбаев зияткерлік мектептерінің түлектері болып табылатын студенттерге;
– сабақтас мамандықтар бойынша техникалық кәсіптік білімі бар студенттерге;
– бакалавриатта оқыған кезде магистратураның білім беру бағдарламасының пәндерін оқыған магистранттарға;
– студенттер қатарына қабылданған кезде бакалавриат білім беру бағдарламасының пәндерін 35-тен артық емес ECTS меңгерген «Жоғары сынып оқушыларына арналған бакалавриат» (Provisional Program) бағдарламасының тыңдаушыларына;
– бакалавриат немесе магистратура білім беру бағдарламаларының пәндерін меңгерген тыңдаушыларға (non-degree) студенттер немесе магистранттар құрамына қабылдау кезінде («тыңдаушы (non-degree)» мәртебесінде болу мерзімі 3 жылдан аспайды).
Пәндердің тізімі және кредиттерді қайта санауға қойылатын талаптар Жоғары мектептердің академиялық каталогтарында қарастырылады.

Транскрипт – кредиттері мен бағалары көрсетілген тиісті оқу кезеңі ішінде игерілген пәндер тізбесі мен оқу жұмысының басқа түрлерінен құралған құжат.

Транскриптіге «қанағаттанарлықсыз» баламасына сәйкес келетін «FX» және «F» бағаларын қоса алғанда, қорытынды бақылау (емтихан) бойынша барлық алған бағалар көрсетіле отырып, білім алушы оқыған барлық оқу пәндері міндетті түрде жазылады.

Транскрипт мынадай элементтерді қамтиды:

– ЖОО-ның атауы және оның байланыс деректері;
– Жоғары мектептің атауы;
– білім алушының деректері (тегі, аты, әкесінің аты, жеке коды (ID));
– білім беру бағдарламасының (мамандықтың) атауы;
– ECTS кредиттері мен бағалары көрсетілген тиісті оқу кезеңі ішіндегі игерілген пәндер (білім беру компоненттерінің) тізбесі;
– академиялық кезең және бүкіл оқу кезеңі ішіндегі үлгерімнің орташа баллы (GPA).

Білім алушыларға Провост қол қойған және M.S.Narıkbaev atyndaġy KAZGUU Unıversıteti-нің мөрімен расталған ресми транскриптіні Офис регистратор береді.

Бейресми транскриптіні (Провостың қолы қойылмаған және мөрмен расталмаған) «Платон» ААЖ-да білім алушының жеке кабинетінен алуға болады.

Әртүрлі себептермен білім алушы оқудан шығарылған жағдайда, оған ресми транскрипт беріледі.

M.S.Narıkbaev atyndaġy KAZGUU Unıversıteti-нің білім алушыларына “Платон” ААЖ және Canvas LMS автоматтандырылған ақпараттық жүйесінде өз виртуалды кабинеті бөлінеді, сондай-ақ корпоративтік почта ұсынылады.
“Платон” ААЖ, Canvas LMS және корпоративтік почтаның пайдаланушылары болып табылатын M.S.Narıkbaev atyndaġy KAZGUU Unıversıteti-нің білім алушылары құпиялылықты сақтауға және дербес деректерді қорғау шараларын қолдануға міндетті, өздерінің жүйеге кіруін қамтамасыз ететін жеке логині (пайдаланушы аты) мен паролін біреуге беруге құқығы жоқ.